Rematan as sesións de formación, mais o proxecto continúa!

Teamwork by Nick Youngson CC BY-SA 3.0

O 30 de marzo tivemos a última sesión de formación enmarcada no PFPP sobre a Avaliación Formativa.

Comezamos cun repaso sobre a autoavaliación, que ocupou a meirande parte da sesión anterior, coa profesora Carla Dechant explicando como emprega ela as checklists de Moodle para que o alumnado autoavalíe o seu traballo antes de facer a entrega da correspondente tarefa.

Carla Dechant amosando as checklists para autoavaliación

Para tratar o tema da coavaliación, Carla propuxo un xogo de Kahoot baseado no artigo de Keith Topping: “Peer Assessment: Learning by Judging and Discussing the Work of Other Learners”. Participamos por equipos e ademais de aprender pasámolo moi ben competindo!

Os equipos a debater as preguntas do Kahoot

A profesora Isabel de la Cruz fixo unha breve introdución ao funcionamento da ferramenta “Taller” en Moodle, para ensinarnos como podemos empregala para a coavaliación. Amosounos tamén un exemplo de tarefa que levou a cabo co seu alumnado de semipresencial e ofreceuse a facer un titorial máis detallado para o profesorado queira empregar esta ferramenta nas súas aulas.

Isabel de la Cruz amosando como empregar a ferramenta Taller

Por último, centrámonos na reflexión e seguimento do alumnado como parte fundamental da Avaliación Formativa. Para favorecer a reflexión do alumnado, Carla presentou diferentes ferramentas nas que podemos atopar modelos de entry ou exit tickets, como Profestation, Ziplet e Canva. No tocante ao seguimento do alumnado, falamos da utilidade dos portafolios, tanto tradicionais coma dixitais, e dos diarios de aprendizaxe, que podemos facer empregando distintas ferramentas: o “Journal” de Moodle ou Penzu, que permite engadir contido multimedia e mesmo escaneos do traballo na aula.

O profesor Manuel del Río compartiu connosco a súa experiencia empregando tanto portafolios como diarios de aprendizaxe. Para el, o importante é darlle opcións ao alumnado para crear un diario de aprendizaxe en diferentes formatos, ben sexa no seu propio caderno, nunha web, ou creando un blog propio.

Manuel del Río amosando o diario de aprendizaxe dun alumno

Durante o pasado mes de abril, o profesorado participante no plan de formación estivo traballando para deixar listos os materiais que creamos tomando como base o aprendido sobre a AF durante estas sesións. Aquí podedes ver algúns dos materiais creados:

Infografía sobre AF para o alumnado:

Banco de ferramentas da AF:

Aínda fican un par de mobilidades neste proxecto. Mentres tanto, seguimos formándonos e compartindo o aprendido!